Si so gut un kaam neger!

Fein dat Du op mien Internetsiet inkieken deist. Ditt is eerst de Anfang vun dat, wat ik mi vörnahmen heff, aber mit de Tiet finns Du hier immer mehr, wat mit Plattdüütsch in un um Flensburg to doon hett.
Söchst Du op Dien Neegde Kontakt to plattdüütsche Lüüd? Wisst Du wat weten över plattdüütsche Veranstaltungs? Snackst Du selbst Plattdüütsch oder magst Du geern tohören, wenn annern dat doon? Wisst Du wat doon dorför, dat de plattdüütsche Spraak lebennig blifft? Denn bist Du hier richtig.

Dörch disse Internetsiet wüll ik, Annemarie Jensen ut Flensburg, geern Frünnen vun de plattdüütsche Spraak mitenanner bekannt maken, dat wi unse Spraak tosamen geneten un plegen könen. Mit anner Lüüd tosamen is dat lichter un maakt uk veel mehr Spaaß, as wenn een alleen dormit tositt.
Warr nich bang. Ik schriev glieks täämlich veel Text. Dat mutt sien, wenn ik verkloren wüll, wat ik vörheff. Dorbi is Plattdüütsch eentlich nich so richtig en Schrievspraak, dat is veel mehr en Snackspraak.
Dat Beste, wat wi för unse Spraak doon könen, is: Plattdüütsch snacken! So sullen wi uk geern bald mal mitenanner snacken, dat wi uns kennenlehren.

Dat gifft aber uk wunnerbore plattdüütsche Texte, to lesen oder to spelen as Theåterstücken. De muchen wi wiss nich missen. Un dat gifft vele enkelte Lüüd, Gruppen, Vereens, Organisations un Institutions, de op de een oder anner Wies wat för dat Plattdüütsche doon. 

En Nett för dat Plattdüütsche

Bi’t Schrieven heff ik böös vele hoochdüütsche Wöör tohülp nahmen. Man ohne de kamen wi in unse moderne Welt nich mehr ut. Denn wi wüllen in de niee Tiet bestahen un verstahen warrn. Dat wi unse plattdüütsche Spraak un Egenaart bewahren, kann uns de moderne Informationstechnik helpen. Denn dör dat Internet könen uk wi Plattdüütschen neger toeenanner kamen.
Mien Plan is, över Internet möglichst veel, wat gut sien kann för dat Plattdüütsche, tosamentoknütten to en Nett (Netzwerk) för dat Plattdüütsche. Dat hier is de Anfang, un denn sall dat Nett mit de Tiet immer grötter un faster warrn.
Themen, Menschen un Adressen, de op de nächste Sieden opföhrt sind, sind de Fadens un Knütten vun dat Nett. Uk Du kannst Di sotoseggen mit inknütten in dat Nett: Du kannst Di Informations un Hülp holen, Di bi Lüüd oder Gruppen ansluten oder Du kannst wat anbeden (blooß as Bispill: Plattdüütsch snacken mit annern, in Scholen un Kinnergoorns oder mit öllere Lüüd). Villicht hest Du uk noch ganz anner Ideen, wat man för dat Plattdüütsche doon kann. Laat mi dat weten. Ik wüll denn versöken, Di mit annern tosamen to bringen, de so’n ähnliche Ideen hebben as Du.
Een Deel is mi nu aber ganz wichtig: Lang nich jede Fründ vun’t Plattdüütsche hett Internet. Öft sind jüst öllere echte Plattdüütschen dor nich so firm in. Kiek Di in Dien Umgebung mank de Plattdüütschen um! Vertell se vun unse Projekt un segg se Bescheed, wenn dor wat anbaden warrt, wat se interesseren kunn!
Un lang nich jede Fründ vun't Plattdüütsche kann Plattdüütsch lesen. Help Dien Frünnen un Bekannten, dat se mitkriegen doon, wo se Plattdüütsch geneten un villicht uk noch wat dorto lehren köön.
Stööt natürlich uk Dien Frünnen un Bekannten mit Internetanschluss op disse Internetsiet.

Ik freu mi ganz dull op Mails, Breven oder en Snack an’t Telefon. Antworten kannst Du geern op Hoochdüütsch, wenn Du Di nich truust, Plattdüütsch to schrieben oder to snacken.